طزّ ومليون طزّ!

 كتب عبد الفتاح خطاب في "اللواء":

 نُشر هذا المقال في صحيفة «اللواء» بتاريخ أول أيلول 2023، وكنت آمل حذف بعض الأسطر أو الكلمات لأنها لم تعد سارية، لكن للأسف لم يتحقق ذلك، بل اضطررت إلى الإضافة!
طزّ إذا البنك استولى على جنى عمري وحوّلني شحاذ على أبوابه،
طزّ إذا الدولار صار بمئة ألف ليرة،
طزّ إذا راح تطير أسعار الأغذية والأدوية والخدمات أكتر وأكتر وأكتر،

طزّ إذا السلع مزورة، والأغذية فاسدة، والأدوية مقلّدة،
طزّ إذا صرت عاطل عن العمل وولادي فالتين بالشوارع،
طزّ إذا ما عندي تغطية صحيّة، ولا ضمانة شيخوخة، وبدون تأمين إجتماعي،
طزّ إذا ما في كهربا ولا ميّ،
طزّ إذا عندي مشكلة في تأمين حليب وحفاضات ولادي،
طزّ إذا ولادي صاروا بلا مدارس ومش قادر إدفع الأقساط،
طزّ إذا معظم أنواع الأكل ما عادت تفوت على بيتي،
طزّ إذا تيابي وتياب عيلتي مرقّعين وأحذيتنا مبخوشين،
طزّ إذا الحراميّة والشّبيحة عم يعتدوا عليّ في وضح النهار وعلى عينك يا تاجر،
طزّ إذا الشراميط وبيّاعين المخدرات منتشرين بكل مكان وعلى كل زاوية وعلى مدخل بيتي،
طزّ إذا ولا مسؤول فاسد واحد تمّ استرجاع حقوق الناس منّو أو حُكم قضائياً وفات عا لحبس،
طزّ إذا بيتي فرط بعد انفجار المرفأ، وما عندي مصاري إدفع إيجار،
طزّ إذا مجلس النوّاب ما إلو عازة، والقضاء مشلول، والأمن فلتان،
طزّ إذا البلد مش بلد، والمسؤولين مش مسؤولين، والأحزاب مش أحزاب، والنقابات مش نقابات، والجمعيات مش جمعيات، ورجال الدين ما بيخافوا الله،
طزّ ومليون طزّ إذا إسرائيل بدها ترجّعنا للعصر الحجري، وإيران بدها تركبنا، وأميركا بدها تحكمنا.
لكن فشر حدا يقول لي ممنوع علِّق علم أو يافطة جماعتي، أو علِّق صورة زعيمي فداه دمي وروحي وعيلتي وعرضي وشرفي وكرامتي! 
ما عاش اللي بيجيب سيرة الزعيم بحرف واحد! لحد هون وبس... هيدا خط أحمر غامق... ونقطة عالسطر!
وأعلى ما في خيلكم اركبوه، وخلّي الدم يوصل للركب!