تلفزيون لبنان...سامحهم
كتب محمد جابر:
فجأة وبلا مقدمات، احدى المحطات اللي بتابع برامجها واخبارها اختفت عن الشاشة، للوهلة الاولى قلت يمكن العاصفة هيي السبب،هدي الطقس وما رجعت المحطة، وحتى لو رجعت"العاصفة تهب مرتين",.
في اليوم التالي قلبت بالقنوات، ما طلع بوجهي من المحطات المحلية الا تلفزيون لبنان، فبدأت رحلتي مع متابعة اخبار وبرامج تلفزيون الوطن، الوطن الجريح.
بلا وعينا بهالبلد، مننظر لتلفزيون لبنان، انه متخصص بكل شي قديم، احيانا منحس انو الزمن وقف عند هالتلفزيون مع ابو سليم الطبل وأبو ملحم والعاصفة تهب مرتين وحول غرفتي و ٤مجانين وبس و١٠ عبيد صغار وبربر اغا وغيرها من المسلسلات الرائعة، ورغم حبنا لهالمسلسلات اعتبرنا عن خطأ انو تلفزيون لبنان دقة قديمة.
لا تلفزيون هوي لبنان، وبرامجه متنوعة وبحب يحافظ عالاصالة والمسلسلات اللي بيعرضها بتعود لزمن الانتاج النوعي، لما كان لبنان سينما الشرق وتلفزيون الشرق ومسرح الشرق، وكان يقدم اجمل الاعمال، وكلها اعمال ناجحة والدليل استمرارها لعشرات السنوات.
مش لازم نعتبر بعد اليوم انو متابعة تلفزيون لبنان نكتة ، لا من واجب كل حدا فينا يتابعه بشكل يومي، وفكرة انو كل شي للدولة سيء لازم نطلع منها، والا كيف منا نبني دولة، يحس كل حدا منا بانتماء لالها.
سامحهم يا تلفزيون لبنان، انهم لا يدرون ماذا يشاهدون.
