رح بقوم معك...بس قوم انت
كتب محمد جابر:
أيها المواطن العزيز، ماتنطر من الوطن يوقف معك اذا ما بتقوم معه، انت مشكلتك تنبل ما بدك تنهض، مقضيها ناطر تغيرك يوقف تتتوقف معه، على هالحالة أيها المواطن الصالح الى حد ما، رح تقوم القيامة وما حتقوم، يعني حتضلك راوح مكانك.
قيامة الوطن بايدك انت ما غيرك، وأصعب شي ب الوقفة اول كم خطوة، ومن بعدها حتنهض دفعة وحدة وتنتقم بحق كل اللي ما خلوك تقوم، بكل الفترة الماضية
.
انت مشكلتك يا مواطني العزيز، بتقوم دغري بس يكون في عزيمة عمشكل، بتركض دغري وما في اسرع منك بس بدك تعرف فلان من اي منطقة ومن اي طائفة، واذا من "جماعتنا"او من "التانيين"، وبتقوم باسرع من البرق بس يكون في عزيمة، لان بتحب بطنك.
روح عملك شي دورة، مابتفرق اذا يومية او اسبوعية او شهرية، دورة عنوانها "تعلم كيف بتقوم الامم" قوم لحق حالك وشوف المطلوب، قبل ماتسكر بوجهك ونقلك "قوم فوت نام وصير حلام انو بلدنا صارت بلد".
على فكرة يا حبيبي بلدنا تتصير بلد لازم تقوم، واذا كلمة تقوم اخدلها معنى وبدك تغيرها، فيك تستعمل كلمة انهض، المهم يا حبيبي يا تقوم يا تنهض، ياله انا رح اوقف، بس فكر فيها منيح، لا تغيير اذا ما بتنهض، وبس تقوم كلنا رح نقوم معك، ومنعمل تجمع منسميه "تجمع اللبنانيين اللي قرروا يقوموا" قبل ما ينهض غيرن يوقف عنن، وكل قومة وانت بخير.
