بالصوت معالي الوزير..."بيعنا"
كتب محمد جابر:
كل ما اقرأ بيان، او اسمع مؤتمر صحافي لمعالي الوزير، عم بطمنا بكل ثقة انه الاسعار تحت السيطرة، والتجار وعدوه انو حيلتزمهه فيها بدون جشع ولا طمع، بتنتابني موجة تفاؤل، الى ان اذهب الى السوبرماركت حيث تظهر الحقيقة جلية، وادرك انو معالي الوزير طعماني الضرب، او ما عنده معرفة بطبيعة التاجر اللبناني.
بس تسأل عن سعر السلعة، رح تصاب بدهشة ما بعدها دهشة، كل تاجر عنده سعر شي، والكل رافع التسعيرة اضعاف، وعنده الف سبب وسبب، ما في اشطر من التاجر هوي وعم يشرحلك الاسباب الموجبة، وكيف طلع السعر؟.
وبس تسأله عن سعر السلعة، وتكتشف حجم الغلاء، وتقلو انو معالي الوزير قال انها ارخص وحدد التسعيرة هالقد، بجاوبك الجواب الشهير، ليش معالي الوزير عم ببيع ، ومن بعد لحظات من كوكتيل الصمت مع الذهول، بجاوبك بكل ثقة ، اشتري من عنده، فينتهي الامر، وبكون حصل ما حصل.
ومنكتشف بالتواتر، انو عنا بلبنان جمعية اسمها "حماية المستهلك"، يعني باختصار لازم تحمي المستهلك، وكل شي عم تعمله هالجمعية انها بتطلع بيانات بتنقلنا الواقع،واوقات بتبكينا وبتخلينا نخجل منها،وبتطلب منا نقدم شكوى، وتتقدر توصل الشكوى للجمعية يعني حظك من السما، لان بكون اللي ضرب ضرب واللي هرب هرب، وتخبزوا بالافراح.
اهم شي تتذكر يا مواطن، انو معالي الوزير يطوللنا بعمره مش ناسينا، لانه عمبشوف اللي عمبصير، وعم تجي لعندو كل يوم الاسعار، وعم بقلنا انو في غلا، وفيك اذا عندك مشكلة، تتلفن وتنقل معاناتك... وبيسمعلك وهون بينتهي دوره، اما الاسعار فانت وجيبتك، يا بتجيب الغراض اللي بدك ياهن، او بتجيب اخرتك...ملاحظة جلب الآخرة متوفر لكل مواطن، اخرتك بتوصل لعندك بدون تعب.
