بالصوت بلا حب ...بلا بطيخ

كتب محمد جابر:

 الله يعين العشاق بعد كم يوم، الذهب عمبحلق عاليا واوعى حدا يفكر فيه، هيدا مخصص بس "لمن استطاع اليه سبيلا"، وحيضل طالع طلوع، اما اذا بدن يفكروا بالوردة الحمرا، او بالباقة، فالافضل يجربوا يأمنوا قرض "العاشق الولهان الراكض ورا النسوان".

فالافضل يا حبيبي، يا اما بالأساس ما تحب،وبلالك خفقان القلب"وما فيي عيش بلاكي" ويستحسن بلا ما تقلها انت حبيبتي، إلها انت روحي، ويمكن عن جد تروح وبترتاح ساعتها،او فيك تعمل حالك مريض بهالنهار، وخليك بالبيت احسنلك يا مشحر، وبلا هالعراضة بهالنهار، قال حب قال، ولك يحبك برص انت وياها ، شو وين مفكرين حالكن، نشالله مصدق امك وبيك انو نحنا "سويسرا الشرق"، الله يسامحكم على هالكذبة اللي صدقتوها وصدقناها.

ونصيحة اخيرا اوعى تقلها "بحبك"، لان لحقت وقلتها ، حتصير ملزمة ب اونصة ذهب وبتعرف شو يعني اونصة ذهب، رح تقضي كل حياتك جمع مال وماحتغطي حقها، فيك كلمتين حلوين "انت سبيكة حياتي واونصة عمري ومابيسوا نجيب الذهب للذهب.
فخلص بكفي بلا حب بلا بطيخ، او على فكرة البطيخ من جوا احمر، مرقلها حز مع راس بندورة، ورح يدعولك الخضرجية.