يا زهراء... خلّينا ناكل لقمة ورحمينا نحنا والصرصور!
كتب محمد جابر:
زهراء مش عاجبها العجب ولا صيام برجب،كل الوقت من مطعم لمطعم، من فرن لملحمة: هون في صرصور، هونيك مرقت الفأرة، وهون بزق وحيد القرن! وكول يا زبون إذا فيك تاكل.
زهراء كل يوم تنين بتخبطنا بمحاضرة عن ألف باء الطبخ السليم. كل المطاعم، بنظرها، مش مستوفية الشروط، وبسببها رح تسكّر كل مطاعم البلد وتزيد نسبة البطالة، مش تاركة حدا يشتغل ويرتاح!
عزيزي المواطن، إنت وعم تاكل بمطعمك المفضّل، احذر من شي "كبسة زهرائية" بتخليك توقف عن أكلك! كول واشكر ربك إنو ما طلّت زهراء، لأن ساعتها أكيد صحنك رح يطير.
الأصعب لما زهراء تساوي بين الصرصور والجردون اللي عم يكزدروا، وبين الزيتات اللي ما عجبها لونن! وإذا ما عجبها، مندفع نحنا الثمن.
يا أصحاب المطاعم، ما ضروري الصرصور يكزدر — هوّي أخد راحتو! وإذا رصدتوا حركة مشبوهة لشي فأرة، تصرّفوا قبل ما تحضر زهراء، شوية همّة يا شباب، بلا ما تعلّم عليكن وعلينا، وليتو صحتين، والله يبعد زهراء فردون عنكن.
النظافة ما مننكر إنها كتير مهمة للي بيشتغلوا بعالم الطعام، بس معليش... نحنا بلبنان، مش بالسويد! وهيدا الواقع يمكن كلنا عايشينو ومطنّشين، لأن منحب بطننا، ورح نضل نحبها.
